Modu iraunkorrean hazteko beharraz hitz egin zuen Jokin Aperribaik atzo. Horretarako, funtsezkotzat jo zituen Anoetako berrikuntza lanak eta telebista eskubideak. Realak, bere betiko sustraiak moztu gabe, beste era bateko ureztaketa sistema bilatu nahi du biharko enborra tinko-tinkoa izan dadin. Zuzen dabil presidentea.

Estadioa bere egin behar du ezinbestean talde txuri-urdinak, birmoldatu, harmailak gerturatuz eta ahal bada, kopuruan handituz, beti ere proposamen ekonomiko bideragarri baten baitan. Realak ezin du besterik gabe erakundeen atea jo eta eskua luzatu patrikak betetzeko. Horiek egin dute egin beharreko esfortzua. 

Diru-sarrerak handitzearekin batera, jokalari garrantzitsuak erakartzeko ahalmena biderkatu egiten da. Lege zaharreko buruketa. Era berean, agintariek barneratu dute telebistek emandako xoxak ez direla txantxetan hartzeko kontua. Gogor defendatu zurea, negoziatu ahalik eta etekin handiena lortzeko. Horixe egin du Realak eta Digital Plus etxearekin egindako tratua txapela kentzekoa da. Bi hitzetan, Athletickek baino 3 milioi gutxiago jasoko du eta Zaragozak baino sei gehiago, horrek esan nahi duenarekin. Operazio biribila. 

Aperribai eta bere lan taldea ate txikitik sartu ziren klubera duela bi urte terdi. Denbora tarte horretan, kirol lorpenez gain, bulegoetako lana eraginkorra bezain ukaezina da. Ez dago ikusi nahi ez duena baino itsu handiagorik eta gaur gaurkoz, lur azpiko estrategia makurrak sustatzen dituzten horiek hobe lukete isilik egon. Anoetara joaten direnei galdetu bestela ea egungo kontseiluaren jarraikortasunaren aldekoak ote diren? Gehiengoak baietz erantzungo luke. Duela 30 hilabete baino askoz gehiagok. Ongi egindako lanaren fruitu da hori.